Danding kumumpas na sa NPC

TILA higanteng biglang nagising ang “big boss” ng Nationalist People’s Coalition (NPC) na si dating Ambassador Eduardo “Danding” Cojuangco sa gitna ng mga balitang buo na ang desisyon ng partido na suportahan ang umano’y kandidatura nina Senador Grace Poe at Senador Francis ‘Chiz’ Escudero.

Nagpahayag kasi noon si Deputy Speaker at Isabela Congressman Giorgiddi Aggabao na kasado na ang suporta ng NPC at ng Nacionalista Party kina Poe at Escudero, kahit hindi pa nagdedeklara na tatakbo ag dalawa.

“We have looked at our assets and liabilities and we think she would make a good president,” pahayag ni Aggabao noong Hulyo.

Naging mabilis ang pagtanggi ni Senador Cynthia Villar na may namumuong alyansa sa NPC at NP para kay Poe. “I do not know what is the basis of Nationalist People’s Coalition President Giorgidi Aggabao for claiming that NPC and the Nacionalista Party are forming an alliance to support the candidacy of Sen. Grace Poe as president and Sen. Francis Escudero as vice president,” pahayag noon ni Senadora Villar.

Nalaglag si Aggabao dahil sa naging utos ni Cojuangco at ni NPC boss Ramon Ang.

Ayon kay Davao del Sur Governor  Claude Bautista, inutusan sila nina Cojuangco at Ang na makipagpulong kay DILG Secretary Mar Roxas sa baluarte nito sa Quezon City.

“They instructed us to come here. They said, you go to the headquarters of LP because Sec. Mar will talk to you. So, almost all of us NPC members in the province are here,” sabi ni Bautista.

Ayon sa isa pang mataas na opisyal ng NPC na tumangging magpakilala, ang naging utos ni Cojuangco at Ang ay maituturing na ‘show of force’ na silang dalawa pa rin ang nagbabaton sa partido.

Dati nang naiulat na ikinainis ni Cojuangco ang mga pahayag ni Aggabao at mga maniobra ni Isabela Governor Faustino ‘Jun’ Dy III para palabasing buo na ang suporta ng NPC para sa dati nitong miyembro na si Escudero, na iniwan ang partido noong 2009 nang hindi sinuportahan ang kanyang ambisyong tumakbo bilang pangulo.

Dumalo sa pagpupulong ng NPC nitong Lunes si Escudero at Poe na sinasabing “meet and greet” sa mga miyembro nito.

  Sabi naman ng isa pang source sa loob ng NPC na dumalo sa miting, halatang nanliligaw si Escudero sa mga dati nitong kapartido.

  “Napansin naming lahat na talagang umiikot si Chiz. Alam niyang mahirap na tumakbong presidente tapos independent. Kaya eto, halatang nagpapaampon. Kailangan niya ang suporta ng partidong iniwan na niya noon,” diin ng source, na isang mambabatas na matagal nang miyembro ng NPC.