Solon nanindigan sa cannabis bilang medisina (Damo, gamot hindi bisyo)

TININDIGAN ni Isabela Rep. Rodito Albano na ang isinusulong niyang medical cannabis bill ay hindi para gawing legal ang paggamit ng marijuana o i-decriiminalize ang recreational use nito.

Ayon kay Albano, mahigpit at malinaw ang intensiyon ng kanyang House Bill 4477 na gawing legal ang paggamit ng marijuana para lamang sa layuning medikal.

Sa isinagawang pagdinig, hinimok ng mambabatas ang mga kasamahan na buksan ang kanilang isipan para sa wholistic at integrative medicine kagaya ng medical cannabis.

Umani ito ng iba’t ibang reaksyon sa mga dumalong resource person na may kanya-kanyang punto sa usapin

Pagtatanggol ni Dr. Chuck Manansala, ang cannabis o marijuana ay herbal medicine na makatutulong sa pasyenteng nangangailangan nito.

Ayon kay Manansala, kahit ang mga higanteng international pharmaceutical companies ay gumagastos na ngayon ng daan-daang milyong dolyar para sa research at paggamit ng extract na marijuana sa mga gamot.

Ngunit tinutulan ito ng Dangerous Drugs Board dahil ang marijuana ay regulated drug at nakasasama anila sa kalusugan ng mga tao.