Magsasaka kritikal sa tuklaw ng cobra

KRITIKAL ang kondisyon ng 33-anyos na magsasaka makaraan matuklaw ng cobra dakong 12 p.m. kamakalawa sa Natividad, Pangasinan.

Ayon sa mga kaibigan, ang biktimang si Romea Asami, Jr. ay nag-aayos ng mga punla nang matapakan ang cobra kaya siya tinuklaw.

Ani Dr. Juan Cabuan, Jr., siyang sumuri sa pasyente, comatose na ang biktima nang isugod sa ospital. Hindi na rin aniya tumutugon sa ilang pagsusuri ang biktima.

Ayon kay Dr. Ruben Reyes, ang toxicologist na sumuri sa kagat, posibleng cobra ang tumuklaw sa biktima dahil sa bilis ng pinsala sa katawan.

Umaasa ang maybahay ng biktima na maka-recover ang mister lalo’t sa kanya umaasa ang pamilya.