21 sugatan sa karambola ng 3 sasakyan

KINOMPIRMA ng Metro Manila Development Authority (MMDA) na dalawang bus at isang taxi ang nagkarambola sa may bahagi ng East Avenue, Quezon City kamakalawa.

Nasa 21 katao pawang mga pasahero ng bus ang sugatan na agad isinugod sa pinakamalapit na hospital sa lugar.

Ang dalawang bus na nasangkot sa banggaan ay ang Nova bus at Worthy bus transport.

Batay sa report ng MMDA, pagdating sa lugar ng kanilang mga enforcers ay tumakas na ang driver ng dalawang bus.

Inaalam na ng mga awtoridad ang pagkakakilanlan nang tumakas na mga driver habang iniimbestigahan ng QCPD ang nasabing insidente.

Jeep swak sa dagat 1 kritikal, 28 sugatan

ZAMBOANGA CITY – Nag-overshoot at nahulog sa dagat ang isang pampasaherong jeepney sa Zone 1, Brgy. Sinunuc, Zamboanga City dakong 3 p.m. nitong Sabado.

Ayon sa imbestigasyon, 28 pasahero ng jeep ang sugatan sa insidente habang isa ang kritikal ang kalagayan, ayon kay Dr. Rodelin Agbulos.

Ang naturang jeepney ay may plate number na JVX-846 (yellow plate), L300 flat type, kulay green.

Inihayag ni Zamboanga City Mayor Beng Climaco, ang nasabing mga biktima ay tatanggap ng medical assistance.

Sa ngayon, inaalam pa ang kalagayan ng iba pang mga pasahero ng naturang sasakyan.