Lola kinatay puso kinain ng apong adik

SINAKSAK sa dibdib ng isang 19-anyos binatilyo ang kanyang lola saka dinukot at kinain ang puso sa bahay ng biktima sa Brgy. Tapi, Kabankalan City, Negros Occidental, nitong Martes ng madaling-araw.

Ayon kay Supt. Kabankalan City police chief German Garbosa, inamin ni Ruben Jalaman ang pagpatay sa kanyang lola na si Olivia, 85, at kinain ang puso ng matanda dakong 2 a.m. sa bahay ng biktima.

Inihayag ni Garbosa, iniulat ng concerned citizen ang insidente dakong 5 a.m. makaraan matagpuan ang walang buhay na biktimang wakwak ang dibdib sa loob ng kanyang bahay.

“Bukas raw ang pintuan kaya tiningnan ng mga kapitbahay. Gumamit ng kutsilyo, tapos sabi niya kinain raw niya ang puso. Tinanong ko nga kung niluto pa, hindi raw,” ayon kay Garbosa.

Inaresto ng mga pulis si Ruben na umamin sa ginawang krimen.

“Noong tinanong ko siya kung bakit niya ginawa, sabi niya, trip lang daw niya,” dagdag ni Garbosa.

Inihayag ng suspek na manamis-namis at malinamnam ang puso ng kanyang lola ngunit med-yo malansa.

Aniya, pinagsisihan niya ang nagawang pagpatay sa kanyang lola na siyang nagpalaki at nag-alaga sa kanya.

Sinabi ni Garbosa na isasailalim si Ruben sa drug and psychiatric tests.