26 estudyante tinamaan ng typhoid fever (Sa Eastern Samar)

TACLOBAN CITY – Kinompirma ni Department of Health (DoH) Regional Office 8 assistant regional director, Dra. Paula Sydionco, aabot sa 26 estudyante sa Borongan, Eastern Samar, ang tinamaan ng typhoid fever.

Halos lahat ng mga estudyante ay mula sa Pandan National High School.

Ayon sa ulat, nagsimula ang nasabing sakit noong Hulyo 17 at bukod sa pagsusuka, nakaranas din ng pagkahilo at abdominal pain ang mga biktima.

Base sa kanilang paunang imbestigasyon, nagpostibo sa E-coli bacteria ang water source ng paaralan.

Nagpadala na ng isang team ang DoH para sa karagdagang imbestigasyon sa pinagmulan ng sakit.

Posible rin anilang nakuha ito ng mga estudyante mula sa mga ibinibentang inomin sa labas ng nabanggit na paaralan.

Samantala, nilinaw ng opisyal na wala pa sa alarming status ang sakit.