8-anyos apo ng OCD Director nalapnos sa lobo

LA UNION – Patuloy na inoobserbahan sa pagamutan ang isang 8-anyos batang lalaki dahil sa pagkasunog ng itaas na bahagi ng kanyang katawan makaraan pumutok ang hawak na lobo kamakalawa.

Kinilala ang biktimang si Cy-Jhay Lumbre, apo ni Office of Civil Defense (OCD) Regional Director Melchito Castro sa Region 1.

Ayon Dir. Castro, masakit ang kanilang kalooban dahil sa kapabayaan ng kompanyang nagsuplay ng nasabing mga lobo na ginamit nila sa closing ceremony ng selebrasyon ng National Disaster Consciousness Month.

Aniya, hinawakan ng kanyang apo ang isa sa party baloons ngunit bigla na lamang itong pumutok kasama ang iba pang mga lobo.

Dahil sa insidente ay dumanas ng second degree burn at nalapnos ang bahagi ng mukha hanggang sa braso ng biktima.

Nabatid na gumamit ng hydrogen gas, isang uri ng magaan at highly flammable gas, ang supplier ng mga lobo.

Dagdag ni Castro, desidido silang magsampa ng kaukulang kaso laban sa kompanya.