Pinay sa Dubai 6 buwan kulong (P15.7-M nilustay)

HINATULAN ng Dubai Court of First Instance ang 55-anyos Filipina ng anim buwan pagkabilanggo dahil sa paglustay ng halagang Dh1.26 milyon (P15.7 milyon) na pag-aari ng kompanyang pinapasukan sa United Arab Emirates (UAE).

Base sa ulat na inilabas ng Gulf News, hinatulan ng korte ang Filipina (hindi pinangalanan) na mameke ng 9,159 resibo ng mga nag-renew ng health card mula noong 2007 hanggang Marso 2015.

Unang nagsumite ng ‘not guilty plea’ ang Filipina at pinabulaanan ang mga bintang laban sa kanya.

Binigyan siya ng korte ng pagkakataong umapela sa loob ng 13 araw.

Sa rekord ng korte, nagsimulang magtrabaho ang Filipina bilang nurse sa isang hotel sa Dubai hanggang italaga noong 2007 bilang health coordinator na ang trabaho ay hawakan ang health files ng mga empleyado.

Nabulgar lamang ang matagal nang ginagawa ng Filipina makaraan matuklasan ang dalawang resibo na inisyu sa dalawang empleyado na nagbitiw noong 2014.

Naghinala ang auditing manager ng kompanya hanggang simulan ang inventory.

Ayon sa auditing manager, inamin ng akusado na nagsumite siya ng xerox copy ng mga resibo para sa renewal ng health card ng empleyado na dinadala sa klinika ng Dubai Municipality. 

Sinasabing inamin din niya na nilustay niya ang pera na ibinayad ng mga kawani, pinalitan ang mga pangalan at litrato, pati na ang halaga ng dapat bayaran.

Base sa hiwalay na ulat ng Gulf News, inamin ng Filipina na Dh500,000 (P6.2 milyon) lamang ang perang kanyang nilustay mula sa kompanya.