HATAW! D'yaryo ng Bayan hatawtabloid.com
HINDI mapasusubalian ang galing ni Angeline Quinto pagdating sa kantahan. Kaya naman hindi kataka-taka kung siya ang pagkatiwalaang umawit ng official soundtrack ng top-rating primetime drama series ng ABS-CBN na Sana Bukas Pa Ang Kahapon.
Si Angeline rin ang kauna-unahang Filipino singer na umawit ng lahat ng kanta sa isang teleserye album.
“Lahat po ng kanta sa soundtrack ay magkakabit-kabit at may kaugnayan sa buhay ng lahat ng karakter sa serye,” ani Angeline na gumaganap sa kuwento bilang si Angie, ang singer ng bar na nag-date ang mga karakter nina Bea Alonzo at Paulo Avelino.
Bahagi ng track list ang mga kantang Sana Bukas Pa Ang Kahapon, Gusto Kita, Why Can’t It Be, Umiiyak Ang Puso, at Someday. Kasama rin ang Wherever You Are, Hindi Ko Kaya, Muli, at Forever na kinanta ni Angeline kasama si Erik Santos.
Samantala, maari nang makasama si Angeline sa kanyang Angeline Quinto Sings Themes From Sana Bukas Pa Ang Kahapon live show sa 19 East Bar & Grill tuwing Huwebes ng gabi na nagsimula noong Hulyo 3 at magtatagal ito hanggang Agosto 21 (Hulyo 10, 17, at 31, at Agosto 7, 14, at 21). Ang entrance fee sa show na sa ilalim ng produksiyon ng Star Records, Cornerstone, at Dreamscape Entertainment TV ay nagkakahalagang P500. Ito ay may kasamang kopya ng album.
