HATAW! D'yaryo ng Bayan hatawtabloid.com
Mangingibang bakod na raw si Finance Sec. Cezar Purisima dahil ba palubog na ang barko ni PNoy?
Ito ang pag-aanalisa ng mga political observer ng bansa dahil malinaw sa pagkatao ni Purisima, na isa siyang taong nang-iiwan sa ere.
Malinaw sa ginawa niya kay dating pangulong Gloria Macapagal-Arroyo ang pang-iiwan kasama pa ang ibang miyemro ng tinaguriang Hyatt 10 kaya’t tumatak na sa isip ng publiko kung anong klaseng tao ang finance chief ni PNoy.
Sa pinakahuling balita, sasama na raw kay VP Jojo Binay si Purisima dahil malinaw naman sa kasalukuyan na siya ang may pinakamalaking tsansa sa panguluhan sa darating na 2016.
Nag-offer pa raw si Purisima sa grupong Binay na handa raw niyang buuin ang mga taong may kakayahan sa pananalapi upang tugunan ang campaign funds na kailangan sa labanang pampanguluhan.
Marami tuloy ang nagtatanong kung ganito ba talaga kaagap si Purisima gayong dalawang taon pa naman si PNoy sa Malakanyang?
Lumalabas tuloy ang totoong kulay ng kasalukuyang finance chief dahil kung totoong lilipat siya sa kampo ni Binay ay dapat din mag-isip ang pangalawang pangulo ng bansa dahil tiyak na iiwan din siya sa sandaling makaramdam ng pagguho sa kanyang liderato.
Marami rin daw sa mga kapanalig ni Binay ang ayaw kay Purisima dahil sa usapin ng loyalty at sa usapin ng pagiging negosyante nito.
Matatandaang isa si Purisima sa napabalitang nagpatalsik kay Ruffy Biazon sa Customs matapos siyang hindi sundin nito.
May balita rin malakas si Purisima kay PNoy dahil ano man daw ang sabihin niya sa pangulo ay nasusunod o ginagawa.
‘Yan ang dapat pag-aralan ni Binay bago niya tanggapin ang isang Purisima dahil baka iwan lamang siya sa kangkungan at ang mabigat, siya pa ang maglaglag sa kanya kagaya ng ginawa kay Gloria Macapagal-Arroyo.
Alvin Feliciano
