Huwag balewalain pahinga na regalo ng Diyos — Cayetano

PINAALALAHANAN ni Senador Alan Peter Cayetano ang mga Filipino na huwag balewalain ang pahinga dahil ito ay regalo ng Diyos na nagbibigay ng lakas at bagong sigla hindi lang sa katawan kundi pati sa isipan, damdamin, at espirito.

Sa programang CIA 365 with Kuya Alan nitong 6-7 Hunyo, ipinaliwanag ni Cayetano na ang tunay na kahulugan ng pahinga ay may malalim na kaugnayan sa pananampalataya, layunin sa buhay, at kabuuang kalusugan ng isang tao.

“Ang pinakanakakikilala sa produkto ay ‘yung gumawa ng produkto. Kung pagod ka na, alamin mo kung sino ang gumawa sa ‘yo. Bumalik ka sa Manufacturer mo,” wika niya.

Ayon sa senador, ang tunay na pahinga ay nagsisimula kapag muling nagkaroon ng koneksiyon sa Diyos, na Siyang unang nagturo ng kahalagahan ng pamamahinga noong panahon ng paglikha.

“Ang nag-create po, ang nag-imbento ng rest ay ang Panginoon. Sabi sa Genesis, after the seventh day, God completed His work on the seventh day and He rested,” wika niya.

Giit ni Cayetano, ang pahinga ay hindi lang tungkol sa pagtulog. Mahalaga rin kung nasaan ka, kailan ka tumitigil, at kung sino ang kasama mo.

“Rest is also a place… Many of us, ang isang lugar ay puwedeng lugar ng pahinga,” wika niya.

Aniya, bagaman mahalaga ang pisikal na pahinga, mas mabigat at mas mahirap lunasan ang emosyonal, mental, at espirituwal na pagkapagod.

“‘Pag may mental, emotional, spiritual na pagod, napakabigat kasi pati pisikal apektado,” wika niya.

Para kay Cayetano, mahalaga ang matutong magpasalamat at lumapit muli sa Diyos dahil sa gitna ng problema, ang pahinga ay may dahilan at layunin.

“Kahit anong pagsubok ang hinaharap natin, find the strength to say, ‘Thank You, Lord.’ Find the strength to say, ‘Lord may opportunity dito. Lord may purpose Ka dito,” wika niya.

“Kailangan mo ng energy para paglingkuran ang Diyos. Saan ba nanggagaling ang physical energy? Nasa pahinga at tamang kinakain,” dagdag niya.

Ngayong linggo, patuloy na ipinaaalala ng senador na ang pahinga ay hindi lang para makabawi ng lakas kundi para maihanda ang puso at katawan sa mas malalim na paglilingkod, mas tunay na pagmamahal, at mas makabuluhang pamumuhay.

“Rest and growth. Rest and energy. Rest serving God. Rest serving your family. Magkakabit lahat ‘yon, magkatuwang,” wika niya. (NIÑO ACLAN)