Sa Buy-bust Operation ng Cavinti PNP
2 Street Level Individual (SLI) arestado, baril at iligal na droga kumpiskado

Camp BGen Paciano Rizal – Arestado ang dalawang street level individual (SLI) sa ikinasang drug buybust operation ng Cavinti PNP na nakompiskahan ng hinihinalang ilegal na droga at loose firearms.

Kinilala ni P/Col. Gauvin Mel Y. Unos, Acting Provincial Director, Laguna Police Provincial Office, ang mga suspek na sina alyas Randy at Christian.

Sa ulat ni P/Cpt. Sergio C. Amaba, Jr., hepe ng Cavinti Municipal Police Station, nagkasa ang mga operatiba ng drug buybust operation nitong 19 Mayo 2024, dakong 11:20 pm sa Brgy. Duhat, Cavinti, Laguna, na nagresulta sa pagkakaaresto kina alyas Randy at alyas Christian matapos magbenta ng hinihinalang ilegal na droga sa nagpanggap na poseur buyer kapalit ang marked money.

Iniulat na ang mga nakompsika sa mga suspek ay apat na pirasong plastic sachet ng hinihinalang shabu na may timbang isang gramo at nagkakahalaga ng P6,900, isang unit ng kalibre .38 revolver, mga bala, coin purse na nakuha sa mga suspek, at ang ginamit na marked money.

Sa kasalukuyang nasa kustodiya ng Cavinti MPS ang arestadong mga suspek at nahaharap sa kasong paglabag sa RA 9165 o Comprehensive Dangerous Drug Act of 2002 at RA 10591 o Comprehensive Firearms and Ammunition Regulation Act.

Sa mensahe ni Acting Provincial Director ng Laguna PPO na si P/Col. Unos, “Ang pagkakadakip ng pulisya sa dalawang suspek na ito ay isang paraan upang mapigilan ang iba pang krimen na maaari nilang kasangkutan, lalo na’t sila ay nasa impluwensiya ng ilegal na droga at armado ng baril. Ang inyo pong pulisya ay walang pinipiling oras upang ipatupad ang batas, ito ay upang masiguro ang kaligtasan ng ating mamamayan.” (RODERICK PALATINO)