Sa PRO4-A year end thanksgiving competition
LAGUNA PPO NAKASUNGKIT NG PANALO

NAKAMIT ng Laguna PPO ang pangalawang puwesto sa parol competition at pangatlong puwesto sa showband competition sa ginanap na Year End Thanksgiving ng PRO CALABARZON noong Biyernes, 16 Disyembre, sa Bigkis-Lahi Event Center, Camp BGen. Vicente Lim, sa lungsod ng Calamba.

Isinagawa ang Year End Thanksgiving sa pamumuno ni Regional Director P/BGen. Jose Melencio Nartatez, Jr., may temang Paskuhan sa Kampo Lim 2022.

Binigyang papuri ni P/Col. Randy Glenn Silvio, Acting Provincial Director ng Laguna PPO, ang mga pulis ng Laguna PPO na nagtulong-tulong gumawa ng parol para sa nasabing kompetisyon at ang PPO-Band sa pagkapanalo rin sa paligsahan.

Pahayag ni P/Col. Silvio, “Pinupuri ko ang Laguna PPO sa pagwawagi sa mga kompetisyon sa Paskuhan sa Kampo Lim 2022. Ang mga talentong ibinahagi ng pulisya ng Laguna ay ibabahagi rin natin sa komunidad ng lalawigan, kasabay ng pagpapatupad ng ating tungkulin.” (BOY PALATINO)