HATAW! D'yaryo ng Bayan hatawtabloid.com
MATAGUMPAY na naidepensa ni Kazuto Ioka ang kanyang tangang WBO junior bantamweight title nang makabuwelta siya ng panalo via 12-round unanimous decision laban kay fellow four-weight world champion Donnie Nietes sa Ota-City General Gymnasium sa Tokyo. Ang official scores ay 120-108, 118-110 at 117-111.
Sa panalo ni Ioka na rated No. 2 ng Ring Magazine sa 115 pounds ay naipaghiganti niya ang pagkatalo sa Filipino veteran na tumalo sa kanya via 12-round split decision nung Disyembre 2018.
Pagkaraang matalo ni Ioka kay Nietes, bumawi ito ng mga panalo laban kina Aston Palicte (TKO), Jeyvier Cintron (UD 12), Kosei Tanaka (TKO 8), Francisco Roriguez Jr. (UD 12) at Ryuji Fukunaga (UD 12).
Sa simula ng salpukan ng dalawang magaling na boxers ay puno na agad ito ng aksiyon, at si Ioka ay napanatili ang posisyon sa gitna ng ring at naging abala sa kanyang pagbato ng matitinding kombinasyon. Samantalang si Nietes ay maganda rin ang ipinupukol na kanan at jabs.
Ang pagpapakawala ng suntok ng dalawa ay mula sa long range. Pero kitang-kita na si Ioka ang nakagagawa ng ‘tactical decision’ para targetin ang katawan ng kalaban na naging epektibo sa kabuuan ng laban.
Tinapos ni Ioka ang dominasyon kay Nietes para mapagwagian ang isang one-sided na panalo.
Misyon ngayon ni Ioka na makaharap si Juan Francisco Estrada (Ring, WBA), Jesse Rodriguez (WBC) o Fernando Martinez (IBF) para sa isang unification fight.
