HATAW! D'yaryo ng Bayan hatawtabloid.com
ARESTADO ang isang lalaking nakatala bilang most wanted person sa Regional Level sa ikinasang manhunt operation ng mga awtoridad sa bayan ng Liliw, lalawigan ng Laguna, nitong Martes, 10 Pebrero.
Sa ulat kay Acting Provincial Director P/Col. Jonar Yupio ng Laguna PPO, kinilala ang suspek na si alyas Roy, residente sa nabanggit na bayan.
Lumalabas sa ulat ng Liliw MPS, sa pamumuno ni P/Maj. Ajalino Balaoro, natunton ng kanilang mga operatiba ang pinagkukutaan ng suspek na 15 taon nagtago sa batas.
Dakong 12:20 ng tanghali kamakalawa, isinagawa ang operasyon sa Brgy. Ilayang Palina, sa naturang bayan na nagresulta sa pagkakaaresto sa suspek.
Dinakip si alyas Roy sa bisa ng warrant of arrest na inilabas ng Sta. Cruz, Laguna Regional Trial Court (RTC) Branch 91 na may petsang 11 Hulyo 2011 para sa kasong murder na walang inirekomendang piyansa.
Bilang pagtalima sa standard operating procedures, ipinaalam sa akusado ang dahilan ng kanyang pagkakaaresto at maayos na ipinaliwanag sa kanya ang mga karapatang konstitusyonal sa wika na kanyang nauunawaan, at ang mga proteksiyon nito sa ilalim ng RA 9745 o ang Anti-Torture Act of 2009.
Samantala, bilang pagpapatibay sa transparency at accountability sa mga operasyon ng pulisya, ang nasabing operasyon ay maingat na naidokumento at naitala sa pamamagitan ng isang alternative recording device.
Kasalukuyang nasa kustodiya ng Liliw MPS ang arestadong suspek habang ang korte na pinagmulan ng warrant of arrest ay inabisohan sa pagkaaresto.
Pahayag ni Yupio, “Patuloy at maigting na nagsasagawa ang pulisya ng Laguna ng mga operasyon laban sa mga indibiduwal na nagtatago sa batas upang maipagkaloob ang hustisyang nararapat para sa kanilang mga nabiktima. Ang tagumpay ng pulisya sa mga operasyong ito ay tagumpay din ng mamamayan dahil sa suportang ibinibigay nila sa buong ahensiya.” (BOY PALATINO)
