HATAW! D'yaryo ng Bayan hatawtabloid.com
TATLONG araw matapos magsimula ang kanyang termino ay opisyal nang nanumpa si Governor Marisol “Sol” Castillo Aragones- Sampelo bilang punong lalawigan ng Laguna dakong 3:35 ng hapon sa Cultural Center sa Kapitolyo sa Sta Cruz Laguna, kamakalawa.
Si Aragones ay nanumpa kay Quezon Province governor, Dra. Helen Tan na sinaksihan nina Vice Governor JM Carait, mga nanalong Sanguniang Panlalawigan, mga nanalong kongresita, mayor, vice mayor at mga mamamayan ng Laguna.
Sa kanyang pagdating sinalubong si Gov. Aragones ng kanyang kasalukuyang Administrator na si dating Candaba Mayor Jerry Pelayo.
Sa kanyang mensahe, sinabi ni Governor Aragones ang dahilan ng kanyang pagtakbo noong 2022 bilang gobernadora ay ang kanyang naging karanasan noon nang magkasakit ang kanyang ama at doon niya naramdaman na kawawa ang mga mahihirap na kababayan kapag magkasakit ang pamilya.
Natalo man siya noon hindi siya sumuko at muling tumakbo ngayon para sa kapakanan ng kalusugan ng mahihirap na pamilya at hindi siya nabigo kaya sa unang araw ng kanyang panunungkulan bilang gobernadora ng lalawigan ng Laguna agad niyang nilagdaan ang Executive Order No. 1 kontra mataray na kawani ng mga pampublikong hospital.
Sa kanyang ikatlong araw ng panunungkulan, sinimulang ilunsad ni Gobernadora ang Akay Sol Mobile Botika na namamahagi ng libreng maintenance na gamot sa apat na distrito ng lalawigan ng Laguna sa mga may sakit na diabetes, hypertension, high cholesterol, at iba pa.
Nagsimula ang pamamahagi ng libreng gamot sa Barangay Canlalay, Biñan City; Barangay 6A, San Pablo City; Barangay Bubukal, Sta. Cruz; at Barangay Real, Calamba City na pinondohan ng Akay ni Sol Partylist.
Inihayag ni Aragones sa kanyang inagural speech na matapos niyang makipag-usap sa budget officer ng lungsod nabatid niyang mayroong sapat na pondo para makapagtayo ng botika sa lahat ng bayan at lungsod ng Laguna kaya sa Setyembre ay magtatayo ng sampu, sa Oktubre sampu uli, at sa Nobyembre ay makokompleto na ang lahat ng bayan.
Tiniyak ni Aragones na kanyang itutuloy ang nasimulang scholarship program ng nakalipas na administrasyon para sa kabataan kasunod ang pagtitiyak na kanya pa itong daragdagan.
Nanawagan si Gobernadora Aragones sa mga kawani ng lokal na pamahalaan na huwag maging loyal sa kanya kundi dapat maging loyal sa mga mamamayan ng Laguna.
Hindi aniya papayag ang gobernadora na mapunta sa bulsa ng kahit sino ang pondo ng Laguna kaya dapat, ito ay mapunta sa social services at serbisyo sa mga nangangailangan.
Nakatakdang maglunsad ng isang app ang lalawigan sa mga susunod na panahon upang miaabot ang mga gamot sa lahat ng sulok ng probinsiya lalo ang mga nasa baryo upang dito’y maihatid ang mga maintenance medicines.
Nagpasalamat si Governor Aragones kay Administrator Pelayo na hindi siya iniwan at nagbigay ng pag-asa sa kanyang pagtakbo sa ikalawang pagkakataon bilang gobernadora ng lalawigan ng Laguna. (NIÑO ACLAN)
