HATAW! D'yaryo ng Bayan hatawtabloid.com
NANINIWALA si Atty. Lorna Kapunan, seguradong mako-convict si Vice President Sara Duterte sa isinampang impeachment complaint laban sa kanya dahil sa pagiging ‘lutang’ sa kanyang mga sinasabi at ginagawi.
Ayon kay Kapunan, malabong malusutan ni VP Sara ang nakapaloob sa Article 7 ng impeachment complaint — “The totality of respondent’s conduct as Vice President…” — na aniya’y mistulang laging lutang at ‘wala sa sarili’.
Iginiit ni Kapunan, alam niya ang kilos at gawi kung ang isang tao ay baliw o crazy.
“I know what’s crazy looks like… and it looks like that,” pagdidiin ng abogada.
Ani Kapunan, may dysfunctionality kay VP Sara, ito ay dahil sa pinagdaraanan niya at ang pagkakaroon ng dysfunctional family.
Binigyang diin ni Kapunan, sa loob ng 47 taon ng kanyang practice bilang isang court litigation lawyer, ang nilalaman ng Article 7 para sa isang public official ay malinaw na nilabag ni VP Sara.
“When you have an out of body experience is what the word you called ‘lutang’,” ani Kapunan sa isang panayam.
Bukod dito, binanggit ni Kapunan, ang pagkakaroon ng disagreement ng mag-amang Duterte ay lubhang nakaaapekto sa pagkatao ni VP Sara.
Dahil dito, naniniwala si Kapunan na hindi na karapat-dapat pa sa kanyang puwesto si VP Sara.
Gayondin, inihalimbawa ni Kapunan ang ginawang pahayag ni VP Sara nang tumayo sa entablado sa isang kampanya at tinukoy ang tatlong katangian ng lider na dapat iboto ng taong bayan.
Una, hindi isang taga-aliw o sumasayaw; ikalawa, hindi nagbabayad o nagbibigay ng pera; at ikatlo, hindi awtomatikong dapat iboto ang isang kandidato na inendoso ng isang maimpluwensiyang tao.
Lahat ng tinuran ni VP Sara ay sinabing tumutukoy at naglalarawan sa mga kandidatong kanyang inendoso na tila nagpapakita ng kawalan ng komprehensiyon o hindi tamang pag-iisip sa kanyang pahayag. (NIÑO ACLAN)
