HATAW! D'yaryo ng Bayan hatawtabloid.com
HANDA ang Pamilya ko Partylist sa magiging resulta ng halalan sa 12 Mayo 2025.
Ito ang tahasang sinabi ni Atty. Anel Diaz, 1st nominee ng partylist, sa pananatiling pasok sila sa survey pero noong simula ay wala sila sa winning circle.
Ayon kay Diaz, lubha silang nagpapasalamat sa grupo dahil nakikita ng tao ang kanilang pagsisikap at nauunawaan ng taong bayan ang kanilang nais na isulong ang programa para sa pamilyang Filipino.
“Hindi tayo dapat maging complacent kundi lalo tayong maging pursigido sa pangangampanya, kumbaga papasok na tayo sa last two minutes, saka na tayo magpahinga after May 12,” pahayag ni Diaz sa isang panayam.
Aminado si Diaz na habang papalapit na ang halalan ay lalong nadadagdagan ang pressure at ang 12 Mayo ang magiging graduation nilang mga kandidato kung aani ng tagumpay o kabiguan.
Bagamat maraming lokal na partylist hindi sumusuko ang Pamilya Ko Partylist na manuyo ng bawat mamamayan at ang pinakahuli nga ay sa Dasmariñas, Cavite.
Sa kasalukuyan, halos nakaikot na rin sila sa iba’t ibang lugar sa Luzon, Visayas, at Mindanao ngunit kanilang wawakasan ang kampanya sa 9 Mayo sa Pandi, Bulacan upang ganapin ang kanilang grand rally.
Nagpasalamat din ang PKP sa mainit na pagtanggap sa kanila ng mga lokal na opisyal ng mga napuntahan nilang mga bayan at lungsod sa iba’t ibang rehiyon bagama’t hindi nila inaasahan na makukuha ang buong suporta ng mga opisyal ng lokal na pamahalaan lalo’t may mga regional partylist na tumatakbo sa kani-kanilang lugar.
“Ang mahalaga sa amin, they keep it on open playing field, kung baga, hindi naman po kami pinapahirapan, they welcome us at pinapayagan kaming mangampanya at ipahayag sa mga tao ang aming plataporma, para sa amin, malaking bagay na po iyon,” ang nasisiyahang pahayag ni Atty Diaz. (NIÑO ACLAN)
