HATAW! D'yaryo ng Bayan hatawtabloid.com
SA LAYUNING mapabuti ang kalidad ng trabaho sa bansa, isinusulong ng TRABAHO Partylist ang isang makabagong inisyatiba na naglalayong ibalik ang saya at sigla ng mga manggagawa sa kanilang paghahanapbuhay.
Binibigyang-diin ng grupo ang kahalagahan ng makabuluhan at pangmatagalang trabaho, na may inspirasyon mula sa pandaigdigang pamamaraan at konsepto ng “rediscovering joy at work.”
Ayon kay Atty. Mitchell-David L. Espiritu, tagapagsalita ng TRABAHO Partylist, hindi lamang basta pagbibigay ng trabaho ang kanilang adhikain kundi ang pagkakaloob ng makabuluhang hanapbuhay para sa bawat manggagawang Filipino.
Binibigyang-pansin ng kanilang plataporma ang paglikha ng kapaligirang nagtutulak sa pagsasama, personal na pag-unlad, at pangkalahatang kagalingan ng mga empleyado. Dagdag pa niya, ang tunay na kahulugan ng trabaho ay hindi lamang nakasentro sa sahod kundi sa pagtutugma ng kakayahan at hilig ng isang indibiduwal sa kanyang ginagawa, upang mapalakas ang koneksiyon at motibasyon sa trabaho.
“Sa ganitong paraan, natutugunan ang mataas na bilang ng mga temporary jobs at naiiwasan ang high turnover rates,” ani Atty. Espiritu.
Kahapon, personal na pinuntahan ni Atty. Johanne Bautista, first nominee ng TRABAHO partylist, numero 106 sa balota, ang mga opisina, pabrika, pagawaan at palengke sa Navotas upang makita ang kondisyon sa mga pagtratrabaho rito.
Kinumusta niya ang mga manggagawa sa kanilang trabaho pati na rin ang kanilang mga natatanggap na benepisyo upang ito ay masusugan pa.
“Base sa ating pakikipag-usap sa mga manggagawa sa Navotas, ang pagkakaloob ng non-wage benefits tulad ng team building activities ay nagpapasaya at nagpapasigla sa kanilang paghahanapbuhay. Excited po talaga sila [manggagawa],” pagkukuwento ng abogadong nominee.
