HATAW! D'yaryo ng Bayan hatawtabloid.com
I-FLEX
ni Jun Nardo
BALIK-POLITIKA ang director-producer na si Lino Cayetano na tatakbo bilang kongresista ng Taguig sa Mayo 2025.
Ayon kay direk Lino nang humarap sa media sa tulong ng mag-inang Roselle at Atty. Keith Monteverde, parang telenovela ang nangyayari sa kanya ngayon dahil ibang kandidato ang sinusuportahan ng kanyang kapatid na si Sen Allan Cayetano.
Nagulat si direk Lino nang dalawang beses siyang magbigay daan sa kagustuhan ng hipag niyang si Lani Cayetano na bumalik sa puwesto bilang mayor ng Taguig noong 2022 at ngayong 2025.
“Naniniwala ako sa magandang intensiyon naming pareho nina Mayor Lani at Kuya Allan. Pero may mga tao talagang may sariling interes na pilit kaming pinag-aaway.
“Kilala ako bilang independent minded sa magkakapatid at hindi basta-basta sumusunod. Pinag-aaralan ko ang bawat desisyon,” sabi ni direk Lino.
Of course, bukod sa politika eh kilala si direk Lino na naniniwala sa partnership gaya ng ginawa niya sa ABS-CBN, GMA, Viva at ngayon nga eh sa Regal sa pelikulang The Caretakers.
“Saksi ako na kahit na ang magkakaribal na produksiyon ay nagsasama-sama para sa ikabubuti ng nakararami dahil ang ginagawa natin ay hindi para sa atin kundi para sa susunod na henerasyon,” paliwanag ni direk Lino na mahal na mahal pa rin ang industriya kahit nasa mundo rin siya ng politika.
