HATAW! D'yaryo ng Bayan hatawtabloid.com
HINDI nakaligtas ang isang 64-anyos na babae nang sumiklab ang sunog sa isang residential area sa Gagalangin, Tondo, lungsod ng Maynila, nitong Sabado ng gabi, 8 Pebrero.
Natagpuang wala nang buhay ang biktima, na nabatid na natutulog nang magsimula ang sunog, sa loob ng kaniyang bahay sa Brgy. 182.
Ayon sa Bureau of Fire Protection (BFP), nagsimula ang sunog dakong 11:27 ng gabi kamakalawa, at mabilis na itinaas sa ikalawang alarma dakong 11:32 ng gabi.
Mabilis na kumalat ang sunog sa mga kabahayan na karamihan ay gawa sa light materials, na naging pahirap sa mga residente upang lumikas at masagip ang kanilang mga kagamitan.
Nagawang makontrol ng mga bombero ang sunog matapos ang dalawang oras, dakong 1:29 ng madaling araw ng Linggo, 9 Pebrero.
Patuloy na nag-iimbestiga ang mga awtoridad upang matukoy ang sanhi ng sunog.
