HATAW! D'yaryo ng Bayan hatawtabloid.com
PATAY ang isang security guard nang barilin ng kaniyang katrabahong guwardiya dahil sa madalas na pagdating nang huli sa trabaho, nitong Lunes, 3 Pebrero, sa lungsod ng Antipolo, lalawigan ng Rizal.
Sa kuha ng CCTV na narekober sa pinangyarihan ng krimen, makikita ang suspek na bumubunot ng baril at ilang beses na pinaputukan ang biktima na agad binawian ng buhay.
Ayon kay P/Lt. Col. Ryan Manongdo, hepe ng Antipolo CPS, nag-ugat ang insidente sa malimit na pagiging huli sa pagdating sa trabaho ng biktima.
Nabatid na 30 minutong late ang biktima kahapon na ikinagalit ng suspek na siyang kapalitan sa puwesto ng una.
Pahayag ng suspek, hindi ito ang unang beses na late ang biktima.
Imbes umano humingi ng pasensiya, nagalit pa ang biktima at pinagbantaan ang pamilya ng suspek na lalo niyang ikinagalit.
Kasalukuyang nasa kustodiya ng Antipolo CPS ang suspek na nahaharap ngayon ang sa kasong homicide.
