HATAW! D'yaryo ng Bayan hatawtabloid.com
UMABOT sa higit 1.5 milyong kasapi at tagasuporta ng Iglesia ni Cristo (INC) ang nagtipon sa Quirino Grandstand, sa lungsod ng Maynila, nitong Lunes, 13 Enero, upang ipanawagan ang kapayapaan at pagkakaisa sa bansa.
Nagsimulang magsidating ang mga nakilahok nitong Linggo ng gabi, 12 Enero, upang makaiwas sa mabigat na trapiko dulot ng mga isinarang kalsada bilang preparasyon sa rally.
Dakong 9:00 am, iniulat ng mga awtoridad na nasa 701,145 katao na ang dumating at inaasahan pang darami.
Ayon sa Manila Police District (MPD), umabot sa 1.5 milyon katao ang nasa Quirino Grandstand pagsapit ng 12:00 ng tanghali.
Binigyang-diin ng INC na ang rally ay upang ipanawagan ang pagkakaisa at isantabi ang mga pagkakahating politikal upang makamit ang minimithing kapayapaan sa bansa.
Inilinaw din ng mga organizer na walang political agenda ang rally at walang kinalaman sa darating na halalan sa Mayo.
Dala ng mga miyembro ng INC sa Quirino Grandstand ang mga banner na may nakasulat na “Kapayapaan para sa Lahat” at “Pagkakaisa ng Bayan.”
Magkakasabay na ginawa ang National Rally for Peace sa 12 pang lugar sa bansa.
Samantala, nagtalaga ang Manila Police District (MPD) ng 3,000 pulis upang mabantayan kaganapan sa Quirino Grandstand.
