HATAW! D'yaryo ng Bayan hatawtabloid.com
HINAMON ni Senador Ronald “Bato” dela Rosa ang nais magsampa ng kaso laban kay dating Pangulong Rodrigo Duterte kung talagang may sapat na batayan base sa kaniyang naging pahayag sa kanyang pagdalo sa pagdinig ng senado ukol sa kampanyang gera kontra droga sa ilalim ng kanyang administrasyon.
Ayon kay Dela Rosa, sa pagdinig ng senado ay buong tapang na sinabi ni Duterte na inaako niya ang lahat ng responsibilidad ukol sa naganap na programa at proseso sa ilalim ng kanyang administrasyon.
Binigyang diin ni Dela Rosa kung paanong buong tapang na humarap sa senado ang dating pangulo ay tiyak na hindi niya aatrasan ang kahing anong kasong ihahabla laban sa kanya.
Nanindigan si Dela Rosa na sa kanyang palagay ay wala siyang nakikitang naging masamang pahayag ng dating Pangulo sa pagdinig upang maging basehan para sampahan ng kaso.
Ngunit isa ang nais niyang linawin sa publiko na kailanman ay hindi siya nakarinig ng utos kay Duterte noong siya ang Philippine National Police (PNP) chief na kahit sinong mahuli na sangkot sa droga ay patayin at barilin sabihin lang na nanlaban.
Naniniwala si Dela Rosa na kahit sinong pulis lalo na siya na galing sa academy ay hindi susunod sa ganoong utos lalo na’t alam niya ang tama at mali.
Samantala, sinabi ni Dela Rosa, ang kahilingan niyang ipatawag si Ronnie Dayan at Kerwin Espinosa ay hindi upang hiyain si dating Senador Leila de Lima kundi upang bigyang linaw ang mga pahayag na mayroon siyang kinalaman upang ituro ang dating senador.
Paglilinaw ni Dela Rosa, wala na rin saysay ang ano pang sasabihin ng dalawa laban kay De Lima lalo na’t nalitis na ng korte ang kaso nito at nabigyan na ng hatol. (NIÑO ACLAN)
