HATAW! D'yaryo ng Bayan hatawtabloid.com
INILINAW ni Senador Joel Villanueva na ang kanyang pahayag na ‘bingo’ ay tumutukoy sa pangalang isinulat ni Shiela Guo, sinabing ‘kapatid’ ni dating Bamban Mayor Alice Guo, pangalan na minsan nang nabanggit sa pagdinig at ipatatawag ng senado.
Ang paglilinaw ni Villanueva ay kasunod ng kumakalat na fake news sa social media.
Ayon kay Villanueva maliwanag sa isinulat ni Shiela na iyon ang mga taong kasa-kasama ni Alice Guo at hindi ng kahit sino-sino.
Naniniwala si Villanueva, ang mga tangkang ilihis ang katotohanan at usapin ukol sa Philippine Offshore Gaming Operation (POGO) ay hindi magtatagumpay.
Nagbanta at nagpaalala rin si Villanueva sa mga pangalan na binanggit si Shiela na hindi sila makapagtatago at mabuti pang dumalo sa pagdinig ng senado at magsabi ng katotohanan.
Ayon kay Villanueva, hindi maaring makalusot sina Ms. Kat at Ms. Gee, mga pangalang isinulat ni Shiela Guo dahilan para makapagkomento siya ng ‘bingo’ matapos itong mabasa.
Iginiit ni Villanueva na hindi maaring paglaruan ang imbestigasyon ng senado dahil hindi ito perya o sugal na beto-beto.
Nanindigan si Villanueva na walang kahit na sino ang maaaring bahiran ang isinasagawang imbestigasyon lalo ang mga miyembro ng bawat komite. (NIÑO ACLAN)
