Pork is Safe campaign ng mga magbababoy suportado ng DA

TINIYAK ni Agriculture Secretary Francisco “Kiko” Tiu  Laurel, Jr., ang suporta nito sa kampanya ng mga magbababoy sa Filipinas na ipaalam sa publiko na ligtas na kainin ang baboy sa buong bansa.

Sa ginawang “pork is safe lechon chopping event” sa Pasay, kinilala ni Laurel na ang pork industry sa bansa ay isang haligi ng sektor ng agrikultura.

Kaugnay nito ay marapat aniyang tulungan at sama-samang solusyonan ang mga problemang kinakaharap nito.

Matatandaang matagal nang inaaray ng mga magbababoy sa Filipinas ang problema sa African Swine Fever (ASF) na nagresulta sa mahinang benta at pagkalugi ng ilang mga negosyante.

Ibinunyag i Laurel na sisimulan na ang pagbabakuna ng ASF sa Biyernes at mayroong sapat na pondong nakalaan ang pamahalaan para sa taong ito.

Bukod kay Laurel nais din ni AGAP Party-List Rep. Nicanor Briones na dagdagan ang pondo ng sektor ng agrikultura para sa susunod na taon para sa indemnity bilang kompensasyon sa mga magbababoy na namatay ang alagang baboy dahil sa ASF.

Parehong sang-ayon sina laurel at Briones sa panukalang dapat ay confined lamang ang agarang pagbabakuna sa isang babuyan sa sandaling makaranas ng ASF ang isa o ilang mga alagang baboy. (NIÑO ACLAN)