Duterte nagpahayag ng suporta sa pagtakbo ni Chavit bilang Senador

NAGPAHAYAG ng suporta si dating Pangulong Rodrigo Duterte kay dating Ilocos Sur Gov. Luis “Chavit” Singson sakaling tatakbo ito sa pagka-senador sa susunod na taon.

Ani Duterte, isa nang batikang politiko si Singson bukod pa sa kaibigan niya ito.

“Susuportahan ko si Chavit (Singson) if he runs for senator. Kaibigan ko. Seasoned politician ‘yan,” ani Digong sa pre-recorded Basta Dabawenyo podcast na ibinahagi ni Davao City Mayor Baste Duterte sa kanyang YouTube channel.

“Kung sabihin mong sa day to day na buhay ng Filipino, alam niya ang problema ng Filipino kung ano roon sa pinakaibaba. 

“Hindi ‘yung mga graduate na summa cum laude tapos hindi nila kapa, ‘yung kati roon sa baba ng Filipino community.”

Iginiit pa ni Digong na, “Not just because he is my friend, but because alam ko at alam ninyong lahat na matagal na sa politika iyan.

“In everyday life, his long experience in politics means he understands the Filipino problems that must be addressed (by the government),” lahad pa ni Duterte.

Thankful naman si Singson sa pag-eendoso sa kanya ng dating chief executive.

Ayon sa malapit kay Chavit, pinag-iisipan pa ng dating senador ang pagtakbo bilang senador.

Pero aminado ito na marami ang kumukumbinseng balikan ang politika at tumakbo nga bilang senador.