Tolentino tiniyak malinis na tubig sa apektado ng Kanlaon 

BINIGYANG-DIIN ni Senate majority leader Francis Tolentino ang dapat tiyakin ng pamahalaan na magkaroon ng access sa malinis at maiinom na supply ng tubig ang mga residente na apektado ng pagputok ng Mount Kanlaon.

Inilinaw ni Tolentino sa Department of Social Welfare and Development (DSWD) na maaaring kontaminado ang supply ng tubig sa mga komunidad na nakaranas ng pagbuga ng abo mula sa bulkan.

Kaugnay nito, pinatitiyak ng majority leader na magkakaroon ng maayos na koordinasyon sa mga local water districts para masigurong malinis ang supply ng tubig.

Tiniyak ng DSWD na nirerepaso nila ang mga kasalukuyang kasunduan na mayroon sa mga water district utilities sa lugar.

Base sa inisyal na datos ng DSWD, nasa 2,000 indibiduwal mula sa 16 barangay sa Negros Occidental at apat na barangay sa Negros Oriental ang apektado ng pag-aalboroto ng Mt. Kanlaon.

Tinatayang nasa 1,400 inidibiduwal ang kasalukuyang nananatili sa evacuation centers. (NIÑO ACLAN)