HATAW! D'yaryo ng Bayan hatawtabloid.com
“NA-DISCOVER n’yo na ba, graduates, kung ano ang plano ng Diyos sa inyo?”
Sa katanungang ito sinimulan ni Senador Alan Peter Cayetano ang kanyang mensahe tungkol sa paghahanap ng sariling layunin sa buhay sa ika-52 seremonya ng pagtatapos ng Bagong Tanyag Integrated School sa Lungsod ng Taguig nitong Sabado, 1 Hunyo 2024.
“God has a plan for each and every one of you,” tiniyak niya sa 647 nagtapos.
Sa mensahe ni Cayetano, bagong chair ng Senate committee on higher education, hinikayat niya ang mga nagtapos na tukuyin kung ano ang nagbibigay sa kanila ng sigla at itugma ito sa kanilang mga gawain.
“Lahat tayo may purpose sa mata ng Panginoon. Find your purpose, embrace your purpose, and don’t let anyone tell you that you are not important,” aniya.
“Whatever ang purpose ni Lord sa inyong buhay, inilagay na niya ‘yan sa puso mo. Every single one of us ay kailangan sa mundong ito,” dagdag niya.
Binigyang-diin ni Cayetano, mahalaga ang bawat katangian ng bawat isa sapagkat sila’y may natatanging papel sa plano ng Panginoon.
“Ang bawat isa sa inyo ay original. Kung kayo man ay malungkot, just remember na ‘andyan ang Panginoon para sa inyo,” wika niya.
Sa pagtatapos ng kanyang mensahe, nanawagan si Cayetano sa mga estudyante na lubos na kilalanin ang kanilang sarili at sundin ang kanilang natatanging landas. (NIÑO ACLAN)
