Citywide Clearing Ops inilarga ng Pasay LGU sa ilang barangay para paghahanda vs La Niña

NAGSAGAWA ng Citywide Clearing Operation ang pamahalaang lungsod ng Pasay partikular sa Barangay 55, 53, at 50 at sinigurong walang nakahambalang na obstruction sa daanan ng mga tao at mga sasakyan bilang paghahanda sa posibleng epekto ng La Niña phenomenon.

Hinimok ng Pasay City LGU ang mga residente at iba pang stakeholders na makipagtulungan at suportahan ang inisyatiba ng lungsod para sa kalinisan at pagpapabuti sa buong komunidad.

Ayon kay Mayor Emi Calixto Rubiano, kakaibang approach ang kanyang direktiba sa paglilinis sa mga bangketa, estero, komunidad, at mga pangunahing lansangan sa lungsod ng Pasay.

Hindi aniya kailangan ng dahas at puwersa sa paglilinis sa mga komunidad na magdudulot ng pangamba at kaguluhan sa mga barangay.

Sa direktiba ng alcalde, dapat gawing maayos at diplomatiko ang pakikipag-usap sa mga kababayan para mauunawan nila nang lubos ang pangangailangan ng mga constituents na magkapaghanapbuhay.

Aniya, araw-araw ang gagawing pag-iikot ng clearing team kasama ang mga barangay officials at mga kagawad ng Pasay City Police upang paalalahanan ang mga residente para isaayos ang mga illegal parking, illegal terminals, mga sagabal sa bangketa, at mga ambulant vendors na nakasisikip sa trapiko. (NIÑO ACLAN)