HATAW! D'yaryo ng Bayan hatawtabloid.com
ni Niño Aclan
ITINANGGI ng kompanyang Bell Kenz Pharmaceutical, Inc., ang akusasyon na sangkot sila sa multi-level marketing (MLM) scheme sa pagbebenta ng kanilang mga produktong gamot.
Sa pagdinig ng Senate Committee on Health and Demography na pinamumunuan ni Senator Christopher Lawrence “Bong” Go, sinabi ni Bell Kenz Chairperson & Chief Executive Officer (CEO) Dr. Luis Raymond Go, sumusunod sila sa regulasyon ng health industry sa bansa alinsunod sa ethical standard.
Aniya, layunin ng kanilang kompanya na makapagbigay ng affordable at quality medicines partikular para sa hypertension, diabetes at coronary diseases.
Giit ni Dr. Go, wala silang ibinibigay na komisyon sa mga doktor ngunit nang pagbantaan ni Senator Raffy Tulfo na ipakukulong kung siya ay mapatutunayang nagsisinungaling dahil may mga ebidensiyang ‘cheque’ mula sa Bell Kenz na ibinayad sa mga doktor.
“Makukulong ka ngayon. Yari ka ngayon. Kulong ka ngayon. You’re under oath…” banta ni Tulfo.
Sa kalaunan, sinabi ni Go na hindi sila nagbibigay ng komisyon sa halip ay incentive sa mga doktor na nagrereseta ng kanilang mga gamot.
Ngunit wala umanong cash, mamahaling sasakyan, o mamahaling relo kundi ito ay pagdalo sa mga local at international conferences ng mga doktor at kung minsan ay mga medical equipment.
Ayon naman kay Department of Health (DOH) Secretary Teodoro Herbosa, hindi bawal mag-sponsor ang pharma companies ng mga doktor na pupunta sa mga conferences, local at international, basta ito ay nakadeklara sa Food and Drug Administration (FDA).
Sa Senate probe kahapon, sinabi ni Herbosa, naririnig niya ang mga perks na sinabing natatanggap ng mga doktor mula sa ilang pharmaceutical companies pero wala siyang naririnig tungkol sa MLM scheme.
Nitong nakaraang weekend naglabas ng pahayag ang Bell-Kenz.
“Bell-Kenz Pharma Inc. vehemently (denies) the misinformed and unfounded allegations (leveled) against our company,” pahayag ng kompanya.
