HATAW! D'yaryo ng Bayan hatawtabloid.com
NANAWAGAN si Senadora Cynthia Villar na itigil ang kahit anong namamagitang sigalot sa pagitan nina Vice President Sara Duterte at First Lady Liza Marcos.
Ayon kay Villar, kung siya ang asawa ng pangulo, gagawin niya ang lahat para maging matagumpay ang presidente.
Binigyang-linaw ni Villar, hindi niya pipiliing makipag-away at sa halip ay gagawa siya ng mga proyekto para mahalin pa lalo ng publiko ang Pangulo ng bansa.
Matatandaang inamin ng unang ginang na bad shot sa kanya ang ikalawang pangulo ng bansa dahil sa pag-attend ng rally na binabatikos si Pangulong Ferdinand Marcos, Jr.
Sinagot ito ni Vice President Duterte at sinabing karapatan ng unang ginang na sumama ang loob ngunit wala siyang kinalaman sa kanyang mandato bilang bise presidente.
Kaugnay nito, sinabi ni Senador Francis “Chiz” Escudero na posibleng lubhang masakit ang ulo ng Pangulo sa sitwasyong gaya nito ngunit ang kailangan niya ay patuloy na mag-focus sa kanyang trabaho at tungkulin sa bayan.
Ngunit binigyang-diin ni Escudero, may magagawa ang Pangulo sa sitwasyong ito dahil bahagi ito ng kanyang ‘burden.’
Umaasa si Escudero na malalamapasan ng Pangulo ang lahat at ang kanyang prinsipsyo at tungkulin sa bansa ay mananaig.
