HATAW! D'yaryo ng Bayan hatawtabloid.com
INIHAYAG ni Senate Committee on Agriculture and Food chairperson Sen. Cynthia A. Villar na mababawasan ang pangangailangang ng Filipinas na mag-import ng agricultural products kapag masagana ang ani.
Kapag mayroon tayong mga produktong kasalukuyang inaangkat natin, sinabi ni Villar, agaran tayong makapagbibigay ng “ready market” sa ating mga magsasaka.
Sa kanyang mensahe sa Philippine Food and Beverage Expo 2024, tinukoy ni Villar na maaaring makipagkompetensiya ang mga magsasaka sa global market via exports.
Iginiit ng senador na magkakaroon ng maraming trabaho sa kanayunan kapag masagana ang ani sa agrikultura.
Aniya, isusulong nito ang rural development na malaking tulong sa paglago ng ekonomiya.
“If there is assurance of income in agriculture, the young people will go back to agriculture and many OFWs will be encouraged to go home and be with their families because they can earn here,” sabi ni Villar na nagsabing isa siyang OFW advocate.
Aniya, kapag available sa mababang presyo ang local products gaya ng gulay, prutas, livestock, poultry at dairy, may suplay para sa kanilang pagkain at inumin ang mga restaurant, merkado, supermarkets, manufacturers, importers, at consumers.
“That is food security,” dagdag ng senador sa ginanap na food expo na ngayon ay nasa ika-16 taon na.
Inorganisa at pinangunahan ang event sa World Trade Center sa Pasay City ng Philippine Food Processors and Exporters Organization (PHILFOODEX), nangungunang food industry association.
Lumahok dito ang mahigit 300 local growers at entrepreneurs sa food and beverage industry na nagpakita sa traders, buyers, at consumers ng kanilang mga natatanging produkto. Ang Expo ay ginanap mula Biyernes hanggang Linggo, 12-14 Abril 2024. (NIÑO ACLAN)
