Perjury isinampa vs Tiaong ex-mayor

KASONG paglabag sa Article 183 ng Revised Penal Code (RPC) na perjury o pagsisinungaling ang inihain laban sa dating alkalde ng Tiaong, Quezon na si Ramon Preza  sa  Lucena City Regional Trial Court Branch 53, base sa ipinalabas na resolusyon ng Lucena City Prosecutor’s Office noong 11 Enero 2024.

Ang kaso ay nag-ugat sa pinaniniwalaang pagsisinungaling ni Preza nang akusahan niya ng kasong pandaraya at panloloko ang negosyanteng si Frankie Ong sa halagang halos aabot sa P50 milyon.

Pero lumalabas sa imbestigasyon na ang nasabing halaga ay personal na pagkakautang ni Ong sa kanya batay sa counter-affidavit na isinumite ni Preza   sa Makati Prosecutors’ Office.

Pansamantalang nakalalaya si Preza  matapos maglagak nang  P25,000 piyansa matapos ipalabas ang warrant of arrest  ng korte noong 19 Enero 2024.

Sakaling mapatunayang nagkasala si Preza sa kasong perjury,  pagkakakulong na hindi bababa sa anim na taon at isang araw hanggang 10 taon at multang hindi lalampas sa P1 milyon na kanyang kakaharapin.

Matatandaan, kamakailan ay gumulong ang kasong katiwalian na isinampa laban kay Preza sa Office of the Ombudsman,  dahil sa umano’y paggamit ng kanyang impluwensiya at kapangyarihan noong alkalde pa, pabor sa ilang negosyo niya. (NA)