Jen ratsada na sa trabaho

COOL JOE!
ni Joe Barrameda

SA pagpasok ng 2024 ay balik trabaho si Jennylyn Mercado matapos ang matagal din niyang pamamahinga na nataon din ang panahon ng pandemic at biglang pagdadalangtao niya. Siya sana ang unang katambal ni Xian Lim sa unang proyekto sa Kapuso. Dahil dito ay nabigyan siya ng GMA ng iba’t ibang project na pawang magaganda rin naman.

Sa pagbabalik ni Jennylyn ay natuloy din ang tambalan nila ni Xian sa upcoming teleserye na Love, Die Repeat na magsisimula nang umere sa Lunes, January 15. Kaya excited noong first taping day si Xian with Jen since first time niya mami-meet ang Kapuso star. Dati raw ay nakikita lang niya si Jen sa mga notebook ng mga estudyante noong hindi pa siya artista. Uso kasi noong araw ang mga litrato ng mga artista sa mga notebook na tinatangkilik ng fans. Ngayon nga naman ay hindi niya sukat akalain na makakatambal niya ang aktres.

Bukod kina Jen at Xian ay kasama rin sa cast sina Shyr Valdez, Malou de Guzman, Ina Feleo, Mike Tan, Valencia Montenegro, Valerie Concepcion, Mike Tan at marami pang iba. Dahil matagal din namahinga si  Jen ay sabik na aabangan ng mga loyal fan niya.