Mga bagong Sang’gre kinasasabikan

RATED R
ni Rommel Gonzales

PASABOG ang pasilip ng GMA sa Encantadia Chronicles: Sang’gre.

Sa inilabas nitong teaser kamakailan, makikita ang powerful moves at enchanting looks ng bagong henerasyon ng mga Sang’gre na sina Bianca Umali bilang Terra, Faith Da Silva bilang Flamarra, Kelvin Miranda bilang Adamus, at Angel Guardian bilang Deia.

Mapapanood din sa naturang video ang bonggang visual effects ng serye, pero patikim pa lang iyon.

Kasunod nito, marami nang na-excite sa pagbabalik ng Encantadia. Komento ng ilang netizens sa GMA Network Facebook page, “The fans are winning with the new faces, the visual effects, the music, and the element-bending in this teaser! Can’t wait to see this drama once again! Goosebumps talaga.”

Abangan sina Terra, ang bagong tagapangalaga ng Brilyante ng Lupa; Flamarra, anak ni Sang’gre Pirena at ang magmamana ng Brilyante ng Apoy; Adamus, anak ni Alena at ang nag-iisang lalaki sa hanay ng mga bagong Sang’gre; at Deia, ang bagong tagapangalaga ng Brilyante ng Hangin.

Kasama rin sa powerhouse cast sina Glaiza de Castro, Rhian Ramos, Ricky Davao, Sherilyn Reyes, Jamie Wilson, Bianca Manalo, Luis Hontiveros, Vince Maristela, Shuvee Etrata, Pamela Prinster, at ang Gueco twins na sina Vito at Kiel.