Babaeng manggagawa patay sa pagsabog ng paputok

ISANG insidente ng pagsabog ng paputok na naganap sa Fireworks Trading Miracles Manufacturer, Sitio Dam, Brgy. Bunlo, Bocaue, Bulacan, ang nagresulta sa pagkasawi ng isang babae kamakalawa.

Dakong alas-5:40 ng hapon ng Nobyembre 22, 2023, ang nasabing kumpanya ng paputok na pag-aari ni Fe Camantang ay aksidenteng nagkaroon ng pagsabog.

Sa ulat na isinumite kay PColonel Relly B. Arnedo, provincial director ng Bulacan PPO, ng Bocaue Municipal Police Station, kinilala ang biktima na si Rizza Villanueva y Austria, 45-anyos na manggagawa ng paputok at residente ng Sitio Bihunan, Brgy. Bunlo, Bocaue, Bulacan. 

Napag-alamang ang biktima ay gumagawa ng mga baby rocket (lokal na kilala bilang kwitis) nang mangyari ang isang aksidenteng pagsabog na nagresulta sa kanyang nakamamatay na mga pinsala.

Si Villanueva ay agad na dinala sa Bulacan Medical Center sa Malolos City, Bulacan, ng Bocaue Rescue para sa agarang medikal na atensyon ngunit sa kabila ng pagsisikap ng medical team, siya ay binawian ng buhay ng attending physician dahil sa mga pinsala sanhi ng pagsabog.

Kaugnay ng insidente ay matamang nakatuon ang Bulacan Police Provincial Office na tiyakin ang kaligtasan at kagalingan ng mga manggagawa ng paputok sa lalawigan. 

Kasunod nito ay inatasan ni Arnedo ang Bocaue MPS na imbestigahan ang insidente, at paalalahanan ang mga protocol sa kaligtasan upang maiwasan ang mga ganitong insidente sa hinaharap. (MICKA BAUTISTA)