HATAW! D'yaryo ng Bayan hatawtabloid.com
RATED R
ni Rommel Gonzales
INAAWAY ng fans ni Jillian Ward si Allen Dizon.
Sa Abot Kamay Na Pangarap kasi ay salbahe si Dr. Carlos Benitez (Allen) kay Dra. Annalyn Santos (Jillian).
Okay naman kay Allen na ganoon ang karakter niya sa nabanggit na series ng GMA.
“Noong una ayoko. Noong una, nagtatanong ako kay direk [LA Madridejos], sabi ko, ‘Direk, bakit parang nagiging bad boy si Carlos? Parang andami niyang red flag?’
“Sabi niya, ‘Wala eh, ito ‘yung pupuntahan ng role mo eh, kasi masyado kang mabait so, kailangang magkaroon ng kulay ‘yung role mo.’
“Sabi ko, ‘Okay, wala namang problema.’
“Ang inisip ko lang ‘yung fans. Kasi may mga sinasabi sa akin, mga nagagalit sa akin, siyempre dahil mahal nila si Annalyn, mahal nila si Lyneth, eh.”
Nanay ni Analyn si Lyneth na role naman ni Carmina Villarroel.
Dahil dito, nakararanas si Allen ng pamba-bash mula sa fans ni Jillian.
“Maraming nagtsa-chat sa akin,” rebelasyon ni Allen. “Ang mga sinasabi parang, ‘Hoy sinungaling ka! Hindi mo naman inaamin na anak mo si Zoey! Tapos kung makapag-ano ka… plastik!’
“Ganyan. ‘Malaki ngipin!’ ang tumatawang kuwento ni Allen sa mga panlalait sa kanya ng mga nagagalit kay Carlos.
Si Zoey ay si Sparkle actress Kazel Kinouchi na sa istorya ng Abot Kamay Na Pangarap ay tunay na anak ni Carlos kay Moira (Pinky Amador) at hindi ni RJ (Richard Yap).
Samantala, si Allen ang brand ambassador ng SMART Access Philippines na isang international consultancy na ahensiya na tumutulong sa mga nais mag-migrate at mag-aral sa Australia na halos sampung taon nang tumutulong sa pag-aayos ng lahat ng kakailanganin, maging ang visa, ng mga nagnanais mag-aral sa Australia.
May apat na branches ito worldwide— sa Australia, Nepal, Pakistan at dito sa Pilipinas.
Present sa contract signing ni Allen ang manager niyang si Dennis Evangelista, ang SMART Access owner/founder/director na sina Bibhusan Joshi at ang country manager na si Stephanie Lasig.
