HATAW! D'yaryo ng Bayan hatawtabloid.com
TINIYAK ni Senate committee on finance chairman, Senator Juan Edgardo “Sonny” Angara, patuloy na maipapatupad ang 8-point socio-economic agenda ng administrasyong Marcos at iba pang strategic goals para sa ikauunlad ng Filipinas sa ilalim ng panukalang 2024 national budget.
Pagdating sa food security, sinabi ng senador na naglaan ng P107.75 bilyong pondo para sa banner programs ng Department of Agriculture (DA) kasama ang patuloy na pagbibigay ng fuel assistance sninoza mga mangingisda at magsasaka.
Umaasa aniya ang mambabatas na makatutulong ang pondong ito para magampanan ni bagong DA Secretary Francisco Tiu Laurel, Jr., ang kanyang mandato.
Para sa sektor ng transportasyon, ibinahagi ni Angara na maglalaan ng pondo para sa fuel subsidy ng mga public utility vehicles (PUVs) drivers at sa pagpapatuloy ng service contracting program.
Sa sektor ng edukasyon, dinagdagan ng Senado ang pondo para sa Department of Education (DepEd) at sa mga attached agencies nito ng P3.5 bilyon para sa kabuuang pondo na P718.08-B, gayondin sa Commission on Higher Education (CHED), sa Technical Education and Skills Development Authority (TESDA )at sa iba’t ibang state universities and colleges (SUCs).
Sa sektor ng kalusugan, nagdagdag ng P125 milyon para sa programang ‘doktor para sa bayan’ at sa mga healthcare facilities sa buong bansa.
Tinitiyak ni Angara, ang panukalang pambansang pondo ay ipagpapatuloy ang pagbibigay ng ayuda sa mga nangangailangan nating kababayan.
Habang para sa Defense sector ay inirerekomenda ng senador ang dagdag na pondo para sa pagpapanatili ng ating national security, territorial defense, at pagtataguyod ng ating soberanya at sa pagsugpo sa cybercrime na talamak ngayong nangyayari sa bansa. (NIÑO ACLAN)
