HATAW! D'yaryo ng Bayan hatawtabloid.com
BUMULUSOK sa P14 bilyon ang pagkakalugi ng budget airline na AirAsia Philippines sa loob lamang ng dalawang taon, ayon sa isang ulat.
Sa artikulong inilabas ng Bilyonaryo.com (https://bit.ly/40dCYt2) noong 23 Oktubre 2023, sinabi nitong kinukuwestiyon ng auditing firm na Isla Lipana & Co. kung kaya ba talagang makaahon ng airline, pag-aari ng negosyanteng Malaysian na si Tony Fernandes, sa nasabing pagkakalugi.
Sa kanilang pinakahuling annual report, nagpahayag ng matinding pagkabahala ang Isla Lipana sa napakalaking pagkalugi ng AirAsia, na umabot sa P7.9 bilyon noong 2022 at P6.4 bilyon noong 2021. Ang mga nasabing pagkalugi ay nagresulta sa kakulangan sa kapital ng kompanya na umabot sa tumataginting na P39.9 bilyon, o 60 beses na mas mababa sa orihinal nitong kapital.
Bukod sa napakalaking pagkalugi, ang AirAsia ay may hindi rin nakapagbabayad ng mga utang sa mga creditor at aircraft lessor.
Noong 2022, ang AirAsia ay nalubog sa mga hindi pa nababayarang dues at demandable payments na nagkakahalaga ng P11 bilyon, kasama ang isa pang P24 bilyon na dapat bayaran sa loob ng isang taon.
Kapansin-pansin din ang hirap ng AirAsia na bayaran ang mga obligasyon nito na inutang pa noong wala pang pandemic at hindi pa naapektohan nang malala ang aviation industry.
Noong 2018, nabigo ang kompanya na matugunan ang mga financial commitment nito sa P1.78 bilyon utang mula sa BDO Unibank.
Nagawa ng airline na ipagpaliban ang mga pagbabayad sa BDO at muling ayusin ang mga lease contract nito sa mga aircraft supplier, ngunit ang pinakahuling estimate ng Isla Lipana ay nagbabala ng isang “material uncertainty” para sa kakayahan ng AirAsia na lagpasan ito.
Ang nasabing audit ay naglantad din ng ilang nakababahalang financial indicator para sa AirAsia. Ayon dito, ang cash reserves ng kompanya ay bumaba na sa nakababahalang halaga na P84 milyon.
Dagdag pa rito, ang mga hindi nabayarang refund sa mga consumer ay umakyat sa P774 milyon, at ang mga payable sa mga supplier ay tumaas ng 18 porsiyento at umabot sa P16.9 bilyon.
Ang parent company ng AirAsia na Capital A ay gumawa naman ng isang detalyadong plano upang iahon ang budget carrier sa pagkakalubog nito sa problemang pinansiyal, ayon sa isang liham na isinumite sa auditing firm.
