4th batch ng Navotas solo parents, nakatanggap ng cash aid

NAMAHAGI ang pamahalaang lungsod ng Navotas ng tulong pinansiyal sa ika-apat na batch ng mga kalipikadong solo parents sa pamamagitan ng Saya All, Angat All program.

               Umabot sa 220 Navoteño ang nakatanggap ng P2,000 cash subsidy kasunod ng verification ng kanilang bagong-apply o na-renew na solo parent identification card.

“Solo parents face many challenges in raising their children on their own. We want to ensure that they will have a means to provide for their families especially during trying times,” pahayag ni Mayor John Rey Tiangco.

               Nagsimula ang Saya All, Angat All Tulong Pinansiyal para sa solo parents bilang bahagi ng serye ng mga programa ng pamahalaang lungsod sa pandemic recovery.

               “We encourage Navoteño solo parents to register with our social welfare office to qualify for the program,” ani Tiangco.

Ang pamahalaang lungsod, sa pamamagitan ng City Ordinance No. 2019-17, ay nagbibigay din sa indigent solo parents ng P1,000 educational assistance kada school year.

               Habang nagsisilbing kinatawan ng lungsod sa 18th Congress, co-authored ni Tiangco ang House Bill 8097 na, kasama ang Senate Bill 1411, ay pinagsama-sama sa Republic Act 11861 o ang Expanded Solo Parents Welfare Act.

Ang RA 11861 ay nagbigay ng karagdagang benepisyo sa solo parents, kabilang ang P1,000 monthly subsidy, 10% discount at VAT exemption, 7-day parental leave with pay, priority sa scholarship programs at grants, automatic PhilHealth coverage, at iba pa.

Sinabi ni Tiangco, tutustusan ng lungsod ang pagpapatupad ng nasabing batas sa susunod na taon sa pamamagitan ng Gender and Development Funds. (ROMMEL SALES)