HATAW! D'yaryo ng Bayan hatawtabloid.com
TINULDUKAN na ng Commission on Elections (Comelec) ang desisyon nito na tanggalin sa puwesto si Aurora Vice Governor Gerardo Noveras.
Sa resolusyong inilabas ng Comelec en banc, tinanggihan nito ang “motion for reconsideration” na inihain ng kampo ni Noveras.
Alinsunod ang desisyon ng komisyon sa kasong isinampa ni dating Dipaculao Vice Mayor na si Narciso Amansec noong 26 Abril 2022 laban kay Noveras na sinabing sinamantala ang posisyon bilang gobernador ng Aurora para magamit ang mga pasilidad ng lalawigan sa kanyang kampanya para sa vice gubernatorial slate noong 2022 national and local elections (NLE).
Nabatid na tumakbo bilang kandidatong vice governor si Amansec noong 2022 NLE laban kay Noveras nang matapos ang kanyang termino bilang gobernador.
Si Amansec mismo ang nakakita ng pag-imprenta ng mga tarpaulin at iba pang campaign materials ni Noveras sa loob ng Aurora Training Center compound.
Sa unang desisyon na inilabas ng Comelec sa kaso laban kay Noveras, nakakita ng sapat na ebidensiya para mapatunayan na sinamantala niya ang posisyon bilang gobernador ng Aurora para gamitin ang pondo ng probinsiya sa kanyang kandidatura noong 2022 NLE.
Sinabi ng Comelec, pinuwersa ni Noveras ang mga tauhan sa probinsiya para mag-imprenta ng kanyang campaign materials na labag sa batas-eleksiyon ng Filipinas.
Hindi nakadalo si Amansec sa preliminary hearing ng Comelec noong Nobyembre 2022 na maaaring magresulta sa agad na pagdismis ng kanyang petisyon.
Ito ay dahil isang buwan bago ang pagdinig ay inambus at napatay si Amansec, ang kanyang asawang si Merlina at kanilang driver ng mga di kilalang suspek sa loob ng kanilang sinasakyang pick-up sa Barangay Dibatunan.
Ngunit, nitong 6 Setyembre 2023, naglabas ng desisyon ang Comelec en banc base sa mga merito ng kaso na hindi maaaring isantabi lamang dahil sa matinding paglabag sa batas-eleksiyon at hindi lamang sa isang technicality.
Ayon sa Rule 23 ng mga alintuntunin ng Comelec , ang kaso ay maaaring ibasura kung hindi nagpakita ang petitioner o ang kanilang abogado sa preliminary conference.
“However, strict adherence to procedural rules should not operate to shackle the Commission’s efforts to deter and punish the egregious disregard of prohibitions under our substantive electoral laws,” ayon sa desisyon ng Comelec. (NIÑO ACLAN)
