HATAW! D'yaryo ng Bayan hatawtabloid.com
PINAMAMADALI ni Senadora Grace Poe ang pamamahagi ng fuel subsidy sa mga driver ng pampublikong mga sasakyan.
Ayon kay Poe, lubha niyang nauunawaan na dagdag-pasakit sa mga driver at operator ang pagtaas ng presyo ng gasolina.
Ngunit aniya kung tataasan naman ang pasahe, magiging pahirap din ito sa mga pasahero.
Tanong ni Poe, kaya ba ng mga pasaherong saluhin ang pagtaas ng pasahe kahit katataas lang ng minimum fare noong nakaraang taon?
Bukod dito, sinabi ini Poe na dapat mag-isip ang Department of Transportation (DOTr) at LTFRB ng iba pang alternatibong paraan para matulungan ang sektor ng PUV at mga pasahero lalo na’t ang isyu ay provisional kaya dapat ang pamahalaan ay makaisip din ng remedyo.
Tinukoy ni Poe, inilatag na sa 2023 budget ang P3 bilyong fuel subsidy na hindi pa rin nagagamit kahit halos matatapos na ang taon.
Iginiit ni Poe, dapat ay agarang magpalabas ang DOTr ng isang memorandum circulars at agarang ipatupad ang isang memorandum of agreement na tumtukoy sa pamamahagi ng matagal nang naantalang fuel subsidy.
Muling nanawagan si Poe sa Executive Department partikular sa Department of Finance ang agarang pagsuspende sa excise tax para sa mga produktong petrolyo hanggang maging stabilize na ang presyo nito.
Tiniyak ni Poe, hindi siya susuko sa patuloy na paghahain nito sa kongreso hanggang isang araw ay malagdaan ito.
Idinagdag ng senadora na dapat ay pangunahing sandalan ng mga tsuper ang gobyerno tuwing may pagtaas sa presyo ng krudo sa pandaigdigang merkado. (NIÑO ACLAN)
