HATAW! D'yaryo ng Bayan hatawtabloid.com
TAHASANG sinabi ni Senadora Grace Poe, bago ipatupad ang dagdag-singil sa pasahe sa light rail transit (LRT) ay mabuting unahin munang ayusin at pagandahin ang serbisyo at mga pasilidad nito.
Ayon kay Poe, ang dagdag na singil na pasahe ay pabigat sa bulsa ng bawat pasahero.
Partikular na tinukoy ni Poe ang mga mag-aaral at mga manggagawang kapos ang pananalapi at umaasa sa mas mababa at murang mass transportation.
Pinayohan ni Poe, bilang private-operated company, inaasahan niyang ang operator ng LRT 1 ay tuloy-tuloy na mag-i-invest para sa mas maayos na train system upang mas kumita ang kanilang ipinuhunan.
Ani Poe, pagdating sa LRT 2, bilyong pisong pondo ang inilalaan ng pamahalaan kada taon.
Tiniyak ng Senadora, ngayong darating na talakayan ukol sa panukalang pambansang budget para sa taong 2024 ay titiyakin niyang malaman ng publiko kung paano nila ginagastos ang perang inilaan ng Kongreso nang sa ganoon ay higit na magbenepisyo ang mga pasahero.
“Kung maganda ang serbisyo, darami ang pasahero. Nararapat lang maramdaman ng mga pasahero ang ligtas, komportable, at modernong train system sa bawat byahe,” giit ni Poe. (NIÑO ACLAN)
