HATAW! D'yaryo ng Bayan hatawtabloid.com
PATAY ang isang pampublikong nars habang kritikal ang kanyang asawa matapos tambangan sa gitna ng malakas na buhos ng ulan nitong Biyernes ng gabi, 26 Mayo, sa bayan ng Sultan Kudarat, sa lalawigan ng Maguindanao del Norte.
Kinilala ni P/Lt. Col. Julhamin Asdani, hepe ng Sultan Kudarat MPS, ang biktimang si Sarifa Kabagani Gulam, 36 anyos, nagtatrabaho bilang nars sa Cotabato Sanitarium Hospital sa Barangay Ungap, sa naturang bayan.
Ani Adwani, agad namatay si Sarifa dahil sa maraming tama ng bala ng baril sa kanyang katawan habang nasa kritikal na kondisyon ang kanyang asawang si Samir Gulam, 35 anyos, nasa lokal na pagamutan.
Nabatid na lulan ng kanilang puting Mitsubishi Montero ang mag-asawa pauwi sa kanilang bahay sa Bgry. San Pablo Village, Cotabato, nang harangin at pagbabarilin ng hindi kilalang mga lalaki pasado 8:00 pm, sa Brgy. Ungap.
Natagpuan ng mga awtoridad sa pagpoproseso ng pinangyarihan ng krimen ang mga basyo ng bala ng kalibre .45 pistol.
Patuloy ang imbestigasyon ng pulisya upang matukoy ang pagkakakilanlan ng mga suspek at ang motibo sa likod ng krimen.
