Julie Anne nagpugay sa mga sumuporta at nagmahal sa kanya bilang Maria Clara

RATED R
ni Rommel Gonzales

NAGBABU na si Julie Anne San Jose bilang si Maria Clara matapos masawi ang kanyang karakter sa madamdaming episode ng Maria Clara at Ibarra noong Biyernes.

Hiling ng aktres, kapulutan ng aral ang kanilang proyekto para sa mga susunod na henerasyon.

“Isang napakalaking karangalan na mapabilang sa programang #MariaClaraAtIbarra ???? Maraming salamat sa @gmanetwork at @sparklegmaartistcenter sa tiwala at pagkakataon na mabigyang buhay ko si Maria Clara,” pasasalamat ni Julie sa kaniyang Instagram.

Pinasalamatan ni Julie Anne ang direktor na si Zig Dulay sa paggabay sa kanya sa bawat eksena, pati na rin sa kanyang co-stars, mga manunulat at buong produksiyon na naging mga kaibigan at pamilya niya.

Pinasalamatan din niya ang viewers na walang sawang sumusubay, sumusuporta, at nagpapaabot ng pagmamahal gabi-gabi.

“Mas minahal ko ang aking larangan bilang artista sapagkat kami ay naging instrumento upang maipakita namin ang makulay at maalab nating kasaysayan,” sabi ni Julie.

“Para sa akin, isang obrang maituturing ang aming palabas. Ito ay siguradong kapupulutang aral, na maipamamana sa mga susunod pang henerasyon. Matapos man ang palabas na ito, ang kultura at kasaysayan natin ay habang buhay na nakatatak sa ating mga puso’t isipan,” dagdag pa niya.

“Ito ang nagpapaalala sa ating mga karapatan bilang tao, at sa ngalan pag-ibig – sa sarili, sa kapwa, at maging sa bayan – tayo ay lumalaban at patuloy na lalaban,” anang Asia’s Limitless Star.

“Hanggang sa muli, ito po ang inyong Maria Clara delos Santos Y Alba, isang maalab na pagpupugay sa kasaysayan ng Pilipinas, salud! ??”