Ian V kitang-kita ang kakisigan

COOL JOE!
ni Joe Barrameda

NANAHIMIK Ang Gabi ang MMFF entry ng Rein Entertainment na pinagbibidahan nina Ian Veneracion at Heaven Peralejo. Sa murang edad ay isang mapangahas na role ang pinasukan ni Heaven at ipinakita sa pelikula ang sexy body niya at may mga kissing scene sila ni Ian. 

Kahit may edad na si Ian ay kitang-kita pa rin ang kakisigan nito. Nakilala namin si Ian noong bata pa ito na minsan ay napapanood ko sa GMA Supershow ni Kuya Germs at regular sa That’s Entertainment. Napanood ko pa noon ang Joey and Son nila ni Joey de Leon at napaka-cute na bata noon si Ian. Pero na-maintain niya ang kanyang kaguwapuhan habang nadaragdagan ang edad.

Isang suspense thriller ang pelikulang ito nila ni Heaven. Napanood namin ang trailer at isa itong cautionary tale na tungkol sa pagharap sa consequences ng mga desisyon natin sa buhay. Isang gabi sa isang mansion sa isang liblib na lugar na dapat ay puno ng mainit at bawal na pag-ibig na mababalot ng karahasan at katatakutan na ‘di inaasahan na papasukin ng isang misteryosong lalaki na ginampanan ni Mon Confiado. 

Wish ni Direk Lino Cayetano na sana ay tangkilikin nating mga Pinoy ang mga pelikula sa MMFF at buhayin muli ang mga sinehan.