HATAW! D'yaryo ng Bayan hatawtabloid.com
MANILA — Nanaig ang 21-anyos na si Toche Quijano, estudyante ng Bachelor of Science, Electrical Engineering sa Marinduque State College mula Buenavista, Marinduque kontra Mark Daniel Perilla ng bayan ng Sta. Cruz sa last round para tanghaling solo champion sa Open Division habang bida ang 9-anyos na si Lenette Shermaine Oh, Grade IV student ng Don Luis Hidalgo Memorial School matapos dominahin ang Kiddie Division sa 1st Governor’s Chess Cup 2022 na ginanap sa MSC Audio-Visual Room sa Tanza, Boac, Marinduque nitong 12 Nobyembre 2022.
Kasalo sa liderato si Perilla sa four rounds na may tig 4.0 points, ngunit giniba ni Quijano sa final round na tumapos ng perfect five points para makopo ang champion’s trophy at maibuslo ang P6,000 cash prize sa Open Division class.
Nagtapos sina Richard Pelaez ng Gasan at Joseph Ricafrente ng Torrijos bilang second at third placers na may tig 4.5 points.
Habang napako si Perilla sa 4.0 points at nahulog sa fourth hanggang seventh placers kasama sina John Christopher Corcuera ng Sta. Cruz, Jeric Mendoza, at Sergio Mataac.
Sa isang banda ay mas mataas ang tie break points ni Oh kay kapwa 4.0 pointer John Meneses Jayag para masungkit ang korona sa kiddie division at maiuwi ang coveted glass trophy plus P5,000.
Sa Women’s Division, tatlong Sta. Cruz lady players na sina Serelyn May Mataac ng Sta. Cruz, Candy Mangandi, Vanessa Joy Regalado, at Maricar Andrin ng Gasan ang kapwa nakaipon ng tig-4 puntos para magsalo sa 1st hanggang 4th places.
Matapos ipatupad ang tie-breaks, ang 17-anyos na si Mataac ang itinanghal na kampeon para tanggapin ang kanyang trophy at P5,000 cash prize.
Sa Senior Division ay kasalo rin ng 69-anyos na si Rodolfo Lanuza, Jr., ng Boac si Rosauro Garay at Gualberto Lusterio para sa top award pero nakamit ng una ang first place matapos ang tie-breaks. Naisubi ni Lanuza Jr., ang Trophy at P5,000 cash.
Inorganisa ng Boac Knight Chess Club, Inc., ang 1st Governor’s Chess Cup ay suportado nina Gov. Presby Velasco, Cong. Lord Allan Velasco, Bahay sa Kanto Café, Green Metro Builders and Dev’t Corp, Constructionline at Marinduque State College. (MARLON BERNARDINO)
