HATAW! D'yaryo ng Bayan hatawtabloid.com
BINAWIAN ng buhay ang isang Nigerian national matapos barilin ng mga suspek na sakay ng kotse habang naglalakad sa Brgy. Mancup, bayan ng Calasiao, lalawigan ng Pangasinan, nitong Sabado, 15 Oktubre.
Kinilala ng PRO-1 PNP ang biktimang si Christopher Clark, 32 anyos, kasalukuyang naninirahan sa Brgy. Malabago, sa naturang bayan.
Ayon sa paunang ulat ng pulisya, naglalakad sa gilid ng highway ang biktima dakong 1:15 am kamakalawa nang bigla siyang hintuan ng isang kotse saka ilang beses pinagbabaril ng mga sakay nito.
Agad namatay ang biktima dahil sa mga tama ng bala sa iba’t ibang bahagi ng kanyang katawan habang nakatakas ang mga suspek.
Ayon sa asawa ng biktima, may tumawag sa kanyang mister sa cellphone kaya umalis patungong Brgy. Mancup kung saan siya pinagbabaril.
Narekober ng mga awtoridad ang pitong basyo ng bala ng hinihinalang kalibre .45, isang depormadong bala, at isang bala na pinaniniwalaang mula sa kalibre 9mm.
Nagpapatuloy ang dragnet at hot pursuit operation na ikinasa ng pulisya upang masukol ang mga suspek.
