HATAW! D'yaryo ng Bayan hatawtabloid.com
BINAWIAN ng buhay ang isang 8-anyos batang lalaki nang malunod sa Ilog Agno, sa bayan ng Alcala, lalawigan ng Pangasinan, habang pinaliliguan ang kanilang alagang baka.
Kinilala ang biktimang si Jozzel John Rigor, 8 anyos, grade 2 pupil, mula sa Brgy. San Vicente, sa nabanggit na bayan, kasama ang kanyang tatlong pinsan, ay nagdesisyong tulungan ang kanyang mga magulang sa pamamagitan ng pagpapaligo sa kanilang alagang baka sa Agno River sa Brgy. Laoac.
Nabatid na hindi nagpaalam ang biktima sa kanyang mga magulang at lumangoy sa ilog kasama ng kanyang mga pinsan.
Sa kasamaang palad, tinangay ng malakas na agos ang bata na naging sanhi ng kanyang pagkalunod.
“Tulala ang mga kasamang bata makaraan ang pangyayari at sa kanilang murang edad na hindi alam ang gagawin sa pagkabigla,” pahayag ng isang residente.
Agad tumawag sa pulisya ang mga residente upang masagip ang bata ngunit kalaunan ay idineklarang dead on arrival sa Bayambang District Hospital.
